രാജ്യത്തെ റെയിൽവേ സംവിധാനത്തെ അടുത്തപടിയിലേക്ക് ഉയർത്തുന്നത് ലക്ഷ്യമിട്ടുകൊണ്ടുള്ള പ്രവർത്തനങ്ങൾ ഫലംകാണുന്നുവെന്ന് റിപ്പോർട്ട്. രാജ്യത്തെ ആദ്യത്തെ ഹൈഡ്രജൻ ട്രെയിൻ മാർച്ച് 31ന് പുറത്തിറക്കുന്നത് ചൂണ്ടിക്കാട്ടിയാണ് ദേശീയ മാധ്യമങ്ങൾ ഇക്കാര്യം റിപ്പോർട്ട് ചെയ്യുന്നത്.
അന്തരീക്ഷ മലിനീകരണവും ഇന്ധന ഉപഭോഗവും കുറയ്ക്കുന്നത് ലക്ഷ്യമിട്ടാണ് ഇന്ത്യൻ റെയിൽവേ ഹൈഡ്രജൻ ട്രെയിനുകൾ പുറത്തിക്കുന്നത്. ഇതിനായി 2023-24 വർഷങ്ങളിൽ 2800 കോടി രൂപയാണ് റെയിൽവേ മന്ത്രാലയം വകയിരുത്തിയത്. നിലവിൽ ചെന്നൈയിലെ ഇന്റഗ്രൽ കോച്ച് ഫാക്ടറിയിൽ നിർമാണത്തിലാണ് ആദ്യത്തെ ഹൈഡ്രജൻ ട്രെയിൻ. ഇത് പുറത്തിറങ്ങുന്നതോടെ സുസ്ഥിരമായ, പരിസ്ഥിതി സൗഹൃദമായ ഗതാഗതമാർഗങ്ങൾ അവലംബിക്കുന്ന രാജ്യങ്ങളുടെ പട്ടികയിൽ ജർമ്മനി, ചൈന, ഫ്രാൻസ്, യുകെ എന്നീ ലോകരാജ്യങ്ങളോടൊപ്പം ഇന്ത്യയും എത്തും.
റിസർച്ച് ഡിസൈൻ ആൻഡ് സ്റ്റാൻഡേർഡ്‌സ് ഓർഗനൈസേഷനാണ് ട്രെയിനിന്റെ ടെക്നോളജിയെയും സൗകര്യങ്ങളെയും സംബന്ധിച്ചുള്ള കാര്യങ്ങൾ നോക്കിനടത്തുന്നത്. നിർമാണം കഴിഞ്ഞാൽ നോർത്ത് റെയിൽവെയുടെ ഡൽഹി ഡിവിഷനിലെ ജിന്ദ് - സോനിപത് പാതയിലാകും സർവീസ് നടത്തുക. നിലവിലെ ഹൈഡ്രജൻ ട്രെയിനുകളുടെ ഇരട്ടി കുതിരശക്തിയുളള ട്രെയിനാണ് ഇന്ത്യ നിർമിക്കുന്നത്.
ഹൈഡ്രജൻ ട്രെയിനുകളുടെ പ്രത്യേകതകൾ
ഹൈഡ്രജൻ ഇന്ധന സെല്ലുകൾ ഉപയോഗിച്ച് പ്രവർത്തിക്കുന്ന ഈ ട്രെയിനുകൾ, ഡീസൽ ട്രെയിനുകളെ അപേക്ഷിച്ച് 100% ശുദ്ധമായ ഊർജ്ജമാണ് ഉപയോഗിക്കുന്നത്. പുകയോ മറ്റ് ഹാനികരമായ വാതകങ്ങളോ പുറന്തള്ളാതെ, ഉപോൽപ്പന്നമായി വെള്ളവും താപവും മാത്രമേ പുറത്തുവിടുന്നുള്ളൂ. അതിനാൽത്തന്നെ, അന്തരീക്ഷ മലിനീകരണം ഒരു പരിധിവരെ നിയന്ത്രിക്കാനാകും.
പരിസ്ഥിതി സൗഹൃദം: കാർബൺ ബഹിർഗമനം ഇല്ലാത്തതിനാൽ പ്രകൃതിക്ക് ദോഷമില്ല.
ഊർജ്ജക്ഷമത: പരമ്പരാഗത ഇന്ധനങ്ങളെക്കാൾ മികച്ച പ്രകടനം കാഴ്ചവെക്കുന്നു.
കുറഞ്ഞ ശബ്ദം: യാത്രക്കാർക്ക് ശാന്തവും സുഖകരവുമായ അനുഭവം നൽകുന്നു.
സാമ്പത്തിക ലാഭം: പ്രാരംഭ ചിലവ് കൂടുതലാണെങ്കിലും, ദീർഘകാലാടിസ്ഥാനത്തിൽ ഇന്ധനച്ചെലവ് കുറവായതിനാൽ ലാഭകരം.
അത്യാധുനിക സൗകര്യങ്ങളോടെ
ഇന്ത്യയുടെ ആദ്യ ഹൈഡ്രജൻ ട്രെയിൻ സാങ്കേതികവിദ്യയിലും സൗകര്യങ്ങളിലുമെല്ലാം മുൻപന്തിയിൽ നിൽക്കുന്ന ഒന്നായിരിക്കും.
വേഗതയും കരുത്തും: മണിക്കൂറിൽ 110 കിലോമീറ്റർ വരെ വേഗത കൈവരിക്കാൻ ശേഷിയുള്ള ഇത്, 1,200 എച്ച്പി പവർ ഔട്ട്പുട്ടുള്ള ഹൈഡ്രജൻ ഇന്ധന സെല്ലുകളാണ് ഉപയോഗിക്കുന്നത്.
യാത്രക്കാരുടെ എണ്ണം: ഒരേ സമയം 2,638 യാത്രക്കാരെ വരെ വഹിക്കാൻ ശേഷിയുള്ള രൂപകൽപ്പന. മെട്രോ നഗരങ്ങളിലെ തിരക്ക് കുറയ്ക്കാൻ ഇത് സഹായകമാകും.
സുരക്ഷയും സൗകര്യവും: നൂതന സാങ്കേതിക നിയന്ത്രണങ്ങൾ, കുറഞ്ഞ ശബ്ദത്തിലുള്ള പ്രവർത്തനം, പരിസ്ഥിതി സംരക്ഷണ സാങ്കേതികവിദ്യകൾ എന്നിവയെല്ലാം ഈ ട്രെയിനിന്റെ സവിശേഷതകളാണ്.
ഹരിയാനയിലെ ജിന്ദ്-സോനെപത് റൂട്ട് തിരഞ്ഞെടുത്തതിന് പിന്നിൽ ഈ പ്രദേശങ്ങളിലെ യാത്രാക്കാരുടെ എണ്ണത്തിലുള്ള വർധനവ് തന്നെയാണ് പ്രധാന കാരണം. ഈ പദ്ധതി വിജയകരമായാൽ, മറ്റ് സംസ്ഥാനങ്ങളിലേക്കും ഹൈഡ്രജൻ ട്രെയിൻ സർവീസുകൾ വ്യാപിപ്പിക്കാൻ സാധ്യതയുണ്ട്.
ഹരിത റെയിൽവേ ലക്ഷ്യത്തിലേക്ക്
2030 ഓടെ നെറ്റ് സീറോ കാർബൺ ബഹിർഗമനം എന്ന ലക്ഷ്യത്തിലേക്ക് എത്താനുള്ള ഇന്ത്യൻ റെയിൽവേയുടെ ശ്രമങ്ങൾക്ക് ഈ പദ്ധതി കരുത്തേകും. ലോകത്തിലെ ആദ്യത്തെ 100% ഹരിത റെയിൽവേ എന്ന ലക്ഷ്യവും ഇന്ത്യക്കുണ്ട്. ജർമ്മനി (2018-ൽ ആദ്യ ഹൈഡ്രജൻ ട്രെയിൻ), ചൈന, യുകെ തുടങ്ങിയ രാജ്യങ്ങൾ ഇതിനോടകം തന്നെ ഹൈഡ്രജൻ ട്രെയിനുകൾ വിജയകരമായി ഉപയോഗിക്കുന്നുണ്ട്. ഈ രാജ്യങ്ങളുടെ പട്ടികയിലേക്ക് ഇന്ത്യയും ചേരുമ്പോൾ, ഹരിത ഊർജ്ജ രംഗത്ത് ഒരു ആഗോള ശക്തിയായി മാറാനുള്ള ഇന്ത്യയുടെ സ്വപ്നങ്ങൾക്ക് ഇത് കൂടുതൽ ഊർജ്ജം നൽകും.