ഊരകം: നെല്ലിപ്പറമ്പ് ജി.എം.എൽ.പി സ്കൂൾ ഒ.കെ മുറിയിലെ കെ.ജി വിഭാഗം 2024-25 വർഷത്തെ നെക്സ്റ്റൺ സ്കോളർഷിപ്പ് പരീക്ഷയിൽ ഉന്നത വിജയം നേടിയവരെ സ്കൂൾ പി.ടി.എ കമ്മിറ്റിയും സ്റ്റാഫ് കൗൺസിലും സംയുക്തമായി ആദരിച്ചു.
പാഠ്യ- പാഠ്യേതര പ്രവർത്തനങ്ങളിൽ എന്നും മുന്നിൽ നിൽക്കുന്ന നെല്ലിപ്പറമ്പ് സ്കൂളിൻ്റെ ഉയർച്ചയിലെ മറ്റൊരു പൊൻ തൂവലാണ് ഈ വിജയം എന്നും തുടർന്നുള്ള വർഷങ്ങളിലും വിജയം ആവർത്തിക്കാൻ സാധിക്കട്ടെ എന്നും സംസ്ഥാന തലത്തിൽ ആയിരക്കണക്കിന് വിദ്യാർത്ഥികൾ പങ്കെടുത്ത പരീക്ഷയായിട്ടും നമ്മുടെ സ്കൂളിൽ നിന്നും പരീക്ഷ എഴുതിയ 50% കുട്ടികൾക്കും സ്കോളർഷിപ്പ് നേടാൻ സാധിച്ചു എന്നത് വലിയ നേട്ടമാണെന്നും അതിൽ തന്നെ ആദ്യ പത്ത് റാങ്കിൽ നമ്മുടെ വിദ്യാലയത്തിലെ 31 കുട്ടികൾ ഉൾപ്പെട്ടു എന്നതും അതിലേറെ അഭിമാനകരമാണെന്നും ആദരവ് ചടങ്ങ് ഉദ്ഘാടനം ചെയ്ത ഊരകം ഗ്രാമ പഞ്ചായത്ത് വൈസ് പ്രസിഡൻ്റ് വി.കെ മൈമൂനത്ത് അഭിപ്രായപ്പെട്ടു.
പി.ടി.എ പ്രസിഡൻ്റ് ശിഹാബ് ചെനക്കൽ അധ്യക്ഷനായിരുന്നു. ഹെഡ്മാസ്റ്റർ സി. അബ്ദുൽ റഷീദ് മാസ്റ്റർ സ്വാഗതവും പ്രീ പ്രൈമറി ഇൻ ചാർജ് ഖൈറുന്നിസ ടീച്ചർ നന്ദിയും പറഞ്ഞ ചടങ്ങിൽ SMC ചെയർമാൻ വി.കെ ഉമർഹാജി, നസീമ ടീച്ചർ, ഹനിയ്യ ടീച്ചർ, രജിത്ര ടീച്ചർ, നഷീദ ടീച്ചർ എന്നിവർ ആശംസ അറിയിക്കുകയും ചെയ്തു.