മലപ്പുറം : അടുത്തവർഷത്തെ ഹജ്ജിനായി കേരള ഹജ്ജ് കമ്മിറ്റി മുഖേന അപേക്ഷിച്ച് നറുക്കെടുപ്പിൽ കാത്തിരിപ്പുപട്ടികയിൽ ഉൾപ്പെട്ട കൂടുതൽപേർക്ക് അവസരം കിട്ടും. ക്രമനമ്പർ ഒന്നുമുതൽ 1711 വരെയുള്ള അപേക്ഷകർക്കാണ് ഹജ്ജിന് അവസരം കിട്ടുക. ഈ പട്ടികയിൽനിന്ന് തിരഞ്ഞെടുക്കപ്പെട്ടവർ ഡിസംബർ 16-ന് മുൻപായി ആദ്യഗഡുവും രണ്ടാംഗഡുവും ഉൾപ്പെടെ ഒരാൾക്ക് 2,72,300 രൂപ അടയ്ക്കണം. ഓരോ കവർ നമ്പറിനും പ്രത്യേകം ലഭിക്കുന്ന ബാങ്ക് റഫറൻസ് നമ്പർ രേഖപ്പെടുത്തിയ പേഇൻ സ്ലിപ്പ് ഉപയോഗിച്ച് സ്റ്റേറ്റ് ബാങ്ക് ഓഫ് ഇന്ത്യ അല്ലെങ്കിൽ യൂണിയൻ ബാങ്ക് ഓഫ് ഇന്ത്യ എന്നിവയുടെ ബ്രാഞ്ചിലോ ഓൺലൈനായോ പണമടയ്ക്കാം.
പണമടച്ച പേഇൻ സ്ലിപ്പ്, നിശ്ചിത മാതൃകയിലുള്ള ഫോട്ടോ പതിച്ച മെഡിക്കൽ സ്‌ക്രീനിങ് ആൻഡ് ഫിറ്റ്‌നസ് സർട്ടിഫിക്കറ്റ് (സർട്ടിഫിക്കറ്റ് ഗവ. അലോപ്പതി ഡോക്ടർ പരിശോധിച്ചതാകണം), ഹജ്ജ് അപേക്ഷാഫോമും അനുബന്ധ രേഖകളും (അപേക്ഷകനും നോമിനിയും ഒപ്പിടണം) ഡിസംബർ 18-നകം സംസ്ഥാന ഹജ്ജ് കമ്മിറ്റി ഓഫീസിലെത്തിക്കണം. കൂടുതൽ വിവരങ്ങൾക്ക് ഹജ്ജ് കമ്മിറ്റി ഓഫീസിലോ ജില്ലാ ട്രെയിനിങ് ഓർഗനൈസർമാരെയോ ബന്ധപ്പെടാം. ഫോൺ: 0483 2710717. hajcommittee.gov.in.