വേങ്ങര: എ എം എൽ പി എസ് വേങ്ങര കുറ്റൂരിന്റെ നൂറാം വാർഷികത്തോടനുബന്ധിച്ച് ശതാരവം 2024 എന്ന പേരിൽ വിവിധ പരിപാടികൾ നടത്തിക്കൊണ്ടിരിക്കുകയാണ്. അതിന്റെ ഭാഗമായി നവംബർ 1 കേരളപ്പിറവി ദിനത്തിൽ എന്റെ കേരളം എന്ന വിഷയത്തെ ആസ്പദമാക്കി വേങ്ങര ഉപജില്ലയിലെ എൽ.പി, യുപി, ഹൈസ്കൂൾ, ഹയർ സെക്കൻഡറി വിഭാഗങ്ങളിലെ കുട്ടികൾക്കായി ക്വിസ് പ്രോഗ്രാം സംഘടിപ്പിച്ചു.
അവതാരകനായി ക്വിസ്സാരിയോ എം ഡി മൃദുൽ മഹേഷ് നേതൃത്വം നൽകി.നാലു വിഭാഗങ്ങളിൽ നിന്നുമായി 60 ഓളം ഗ്രൂപ്പുകൾ മത്സരത്തിൽ പങ്കെടുത്തു. മത്സരം വേങ്ങര ഉപജില്ലാ വിദ്യാഭ്യാസ ഓഫീസർ ടി പ്രമോദ് ഉദ്ഘാടനം നിർവ്വഹിച്ചു. സ്കൂളിലെ പ്രധാന അധ്യാപകൻ പ്രശോഭ് പി എൻ സ്വാഗതവും വാർഷികാഘോഷ കമ്മിറ്റി ചെയർമാൻ കെ ഹസ്സൻ മാസ്റ്റർ അധ്യക്ഷ ഭാഷണം നടത്തുകയും ചെയ്തു.
പരിപാടിയിൽ പ്രോഗ്രാം കമ്മിറ്റി വൈസ് ചെയർമാൻ ഇബ്രാഹിംകുട്ടി മാസ്റ്റർ, പിടിഎ പ്രസിഡൻറ് സുഭാഷ് യു പി, മാനേജർ അബൂബക്കർ പക്കട ,സീനിയർ അസിസ്റ്റൻറ് സുഹ്റാബി ടീച്ചർ എന്നിവർ ആശംസകൾ അർപ്പിച്ചു സംസാരിച്ചു. എസ്.ആർ ജി കൺവീനർ ഖദീജ ടീച്ചർ നന്ദി പ്രകാശിപ്പിച്ചു.
എൽ പി വിഭാഗത്തിൽ ജി എച്ച് എസ് എസ് പെരുവള്ളൂർ, ജി എൽ പി എസ് പറമ്പിൽപീടിക, ജി എൽ പി എസ് നൊട്ടപ്പുറം എന്നീ സ്കൂളുകൾ യഥാക്രമം ഒന്ന്,രണ്ട് , മൂന്ന് സ്ഥാനങ്ങൾ കരസ്ഥമാക്കി. യു പി വിഭാഗത്തിൽ ജി എം വി എച്ച് എസ് എസ് വേങ്ങര, സി എ കെ എം ജി എം യു പി എസ് ചേറൂർ, ജി യു പി എസ് ചോലക്കുണ്ട് എന്നീ സ്കൂളുകൾ യഥാക്രമം ഒന്ന്, രണ്ട്, മൂന്ന് സ്ഥാനങ്ങൾ കരസ്ഥമാക്കി. എച്ച് എസ് വിഭാഗത്തിൽ സെന്റ് പോൾസ് തേഞ്ഞിപ്പലം, ജി വി എച്ച് എസ് എസ് വേങ്ങര, ജി എം വി എച്ച് എസ് എസ് ടൗൺ എന്നീ സ്കൂളുകൾ യഥാക്രമം ഒന്ന്, രണ്ട്, മൂന്ന് സ്ഥാനങ്ങൾ കരസ്ഥമാക്കി. ഹയർസെക്കൻഡറി വിഭാഗത്തിൽ ജി എം എച്ച് എസ് എസ് കാലിക്കറ്റ് യൂണിവേഴ്സിറ്റി, പി കെ എം എം എച്ച്എസ് എസ് എടരിക്കോട് ഐ യു എച്ച് എസ് എസ് പറപ്പൂർ എന്നീ സ്കൂളുകൾ യഥാക്രമം ഒന്ന് രണ്ട് മൂന്ന് സ്ഥാനങ്ങൾ കരസ്ഥമാക്കി.
മത്സരയിനത്തിൽ പങ്കെടുത്ത് വിജയിച്ച വിദ്യാർത്ഥികൾക്ക് നൂറാം വാർഷികാഘോഷ കമ്മിറ്റി ക്യാഷ് പ്രൈസും മൊമെന്റൊയും വിതരണം ചെയ്തു. ക്വിസ് മാസ്റ്റർ മൃദുൽ മഹേഷിന്റെ സരസമായ അവതരണ ശൈലി കുട്ടികളിൽ ആവേശം കൊള്ളിക്കുകയും രക്ഷിതാക്കളിൽ മതിപ്പുളവാക്കുകയും ചെയ്തു.