തിരുവനന്തപുരം: സംസ്ഥാന ഭാഗ്യക്കുറി മൺസൂൺ ബമ്പർ ഒന്നാം സമ്മാനം നേടിയ ഹരിതകർമസേനാംഗങ്ങൾക്ക് ലോട്ടറി വകുപ്പിന്റെ ആദരം. മന്ത്രി ബാലഗോപാൽ സമ്മാനത്തുക ഹരിതകർമസേനാംഗങ്ങൾക്കു കൈമാറി.
പരപ്പനങ്ങാടി നഗരസഭയിലെ ഹരിതകർമസേനാംഗങ്ങളായ പാർവതി, രാധ, ബിന്ദു, ഷീജ, ലീല, ലക്ഷ്മി വിജയൻ, ചന്ദ്രിക, ശോഭ, കാർത്യായനി, കുട്ടിമാളു, ബേബി എന്നിവർ തുക ഏറ്റുവാങ്ങി. ഇവർക്ക് ഓണക്കോടിയും സമ്മാനിച്ചു.
സംസ്ഥാന ഭാഗ്യക്കുറി കേരളത്തിന്റെ പൊതുമേഖലയെ ശാക്തീകരിക്കുന്നുവെന്ന് ധനമന്ത്രി കെ.എൻ.ബാലഗോപാൽ പറഞ്ഞു. ഹരിതകർമസേനാംഗങ്ങൾക്കു ലഭിച്ച മൺസൂൺ ബമ്പർ ഒന്നാം സമ്മാനം അർഹതയുള്ള കൈകളിലാണ് എത്തിയത്. 11 പേർ ചേർന്നെടുത്ത ടിക്കറ്റെന്ന നിലയിൽ ഇത് വിശ്വാസത്തിന്റെയും ടീം വർക്കിന്റെയും വിജയമാണെന്നും മന്ത്രി പറഞ്ഞു. ശരിയായ രീതിയിൽ തുക വിനിയോഗിക്കുന്നതിൽ സമ്മാനജേതാക്കൾ ജാഗ്രത പുലർത്തണമെന്ന് മന്ത്രി എം.ബി.രാജേഷ് പറഞ്ഞു.
മന്ത്രി ആന്റണി രാജു അധ്യക്ഷനായി. നികുതിവകുപ്പ് അഡീഷണൽ ചീഫ് സെക്രട്ടറി എ ജയതിലക്, കുടുംബശ്രീ മിഷൻ എക്സിക്യുട്ടീവ് ഡയറക്ടർ ജാഫർ മാലിക്, ഭാഗ്യക്കുറി ക്ഷേമനിധി ബോർഡ് ചെയർമാൻ പി.വി.സുബൈർ, ലോട്ടറി വകുപ്പ് ജോയിന്റ് ഡയറക്ടർമാരായ മനോജ്, മായ തുടങ്ങിയവർ പങ്കെടുത്തു.